U Danke - dass Du jede Sunntig-Morge vor mir ligsch, u druf wartisch, dasidi nime.

O wede haargenau weisch, das-i Di am gliiche Aabe schowider linggs la lah lige, & mit mim Telefon desume-mache. U när o niemeh wider öppis vo dr wott - ussert bim Härdöpfu-rüschte, - oder Fänschter-putze.

Aber gäu?: dr Sunntig-Morge, dä g'hört nume üüs zwöine.

Itz si das scho 25 Jahr? Me würds chuum gloube.

Guet - ungerdesse bisch ja nümm di Einzigi - aber gengno die, mitem schönschte Name. - SUNNTIGS-ZITTIG.

Weisch, wasmi am meischte fröit a üüs? Dass Du immer eso offe bisch vor mir. Das git mer ds Gfüeu, dass ig mit dir o ganz offe darf sii.

A propos: Dünkt's mi nume, oder hesch echli zuegnoh - ir Letschti? I ha afe au Wuche lenger, bis au di überflüssige Biilage us dr use-g'schüttlet ha. - Guet wenigschtens hesch wider ufghört mit dere Sorte Wärbig, wo tuet, aus wär si gar nid Wärbig, sondern Zittig. Di het di nämlech echli unvorteilhaft la usgseh.

So Züüg hesch DU nid nötig.

Genau so weni, wi di ufem Boulevard aa-z'biete, aus wärsch eini vo dene Gratis-Schlamppene, wo a de Bahnhöf umelungere, u mit jedem mitgöh, wo grad chunnt cho z'tschauppe.

Nei - DU bisch en Ikone. Du bisch SUNNTIGS-ZITTIG. Mitere moderne iPad-App - statt ere verlogene Hetz-Kampagne,

mit KULTUR - statt Sex-Beratig, u FOKUS - statt verwaggelete Läser-Fotos.

Am Sunntig wird intelligänt VERTIEFT - nid primitiv Glüschtelet.

DRUM - bruucht's eini wi Dii: Eini, wo eim nid solang biuig aamacht, bisme mitere i d'Chischte schtigt, sondern weiss, dasme genau därum - umso lieber mitere ufschteit.

Danke für aues Guete - liebi SunntigsZittig. U Happy Birthday!

Reeto von Gunten